Posts Tagged ‘ Lai Lok-yi 黎諾懿 ’

飲熱鮮奶的學問

Image

無綫鍾情飲食,除咗擔心觀衆睇睇下電視肚餓經常提供麵食,亦怕我地睇得電視多瞓唔着,長期有熱鮮奶供應。為何家家戶戶夜麻麻都有鮮奶呢,好易解釋,香港食肉文化當道,vegan都唔多個,加上西化生活習慣,牛奶就是必然,對不?你而家走到雪櫃,無鮮奶嘅話就唔係香港人。

唉呀,咁《愛.回家》呢幕都係劇情需要啫,郭少芸特登買鮮奶裝黎諾懿嘛,唔係在家必備來,讓我們忘記另外千千萬萬個夜晚飲熱鮮奶橋段吧。就睇返飲熱鮮奶呢個動作,學問就多,首先要準備一隻杯,呢隻係非一般嘅杯,係非常一般嘅杯,係你同我屋企都未必有嘅default杯;default杯無柄,所以要如此輕鬆徒手攞住杯熱嘢非一般人做到;一般人亦唔會三秒飲完一杯熱鮮奶;仲有,熱鮮奶係無煙嘅。種種非一般,絕非易事。

唉呀,都係個名啫,可能奶係暖嘅,咪無咩煙,咪可以攞住唔覺熱囖。我地就講下個名,點解熱鮮奶要叫做熱鮮奶呢,茶餐廳嗌嘢飲咩,飲咖啡你就飲啦,請人飲咖啡你就請啦,熱咩咖啡呀,汪阿姐咩,阿媽蒸完條魚出來,「埋來食熱魚啦」咁呀?即係呢,佢地手上係可樂又好係凍啡又好,最後佢地都係講俾人聼啫,聼電視丫嘛。呢種做法唔係唔得,始終演戲就係要演,的確唔係要樣樣用真嘢,但係當拍戲嘅時候各單位無咁多心機思考應該點做,就會出現好假嘅情況。咁嘅時候,依情理比較真實嘅道具就幫到手,如果換個mug俾佢地,咪可以唔怕熱囖,但係適量動作都唔少得,扮吹下﹑慢慢飲都唔太多好合理丫;或者真係要用default杯嘅話,咪用真熱奶囖,咁就好自然會有生理反射有各類手勢,唔洗演添。呢場戲,唯一要「睇」就係從透明default杯見到黎諾懿真係飲嗮杯奶,但係飲得多與少從簡單動作已經可以見到,如果呢個係用透明杯嘅原因,就係出腸道具。

當一套電視劇係咁E將隻杯遞來遞去就咁講嗮啲對白就算,仲係咪一個電視劇,仲洗唔洗有聲有畫響電視播,個電視台仲洗唔洗存在?

廣告