Archive for the ‘ Others 其他 ’ Category

人係應該進步嘅

過咗咁多年,呢件事一直響心裏面覺得要處理。雖然不嬲走批判精神,整體對製造咗一啲評論同建立咗思考方向算滿意,但始終有睇唔透嘅地方、想法改變嘅階段,一直再三反思同學習,亦見到以前嘅不足甚至錯誤。雖然多年前做呢個blog已經特別處理性別議題,仍然有對性別意識型態未建構妥善嘅地方、亦未能對LGBTQIA關注周到(即父權),有關內地與被剝削國域用字苛刻(即優越主義),未有關注有關障礙者之論述(即健全主義)等等,其實呢啲位我自己發現,未必係明顯或故意嘅冒犯,其他人或不察覺(因為我地都係鍾意一齊錯嘅人),正正係呢啲看似細微嘅問題不斷發生,令社會有咁多歧視同矛盾,所以對自己更加嚴謹係必要。咩崇洋、民粹,用最容易嘅語言同最多人溝通,我都做過啦,100毛響惡劣嘅時勢仲要咁做,就係不思進取、邪惡(啊,我仲讚過黑紙,大錯特錯)。如果你幾年前或更早以前覺得要不斷批評TVB(因為而家嘅共識已經係睇都費事),而家需要不斷批評嘅,就係100毛、毛記電視。除咗遲來的道歉,呢段字嘅重點唔係要針對佢地,因為「佢地」越來越多,無論揸住「創新」、「前衛」旗幟嘅新媒體同電視台有幾多(事實係另一種建制),我地都要保持用心觀察同反思,最重要,係同時要照鏡。TVB死唔死唔代表啲咩,多多幾個電視台唔代表希望,我地一日唔努力諗嘢一日都無用。

廣告

歡樂今宵再會

超耐無update,話説我個TVBmademeopenthis面書頁唔該都無聲俾人成個剷走咗,本來仲諗住放一放下面張圖講聲byebye就金盤洗手,而家死死氣氣開多個新page,仲要發唔到牌,即係我要繼續做,無計,我盡力睇返垃圾啦。如果你地仲有睇呢個blog就like返我啦。

新頁:http://www.facebook.com/TVBmademehihithis

tvb rip

消失的性別歧視

black paper discrimination

《黑紙》 2013.1.15 #02

性別歧視竟成了無事,是荒謬的奇事

我鍾意呢期卓韻芝嘅内容,但係調查部份有誤導傾向。首先調查為何會是「選舉」?引用政治諷喻當然可以,但在這個題目不太適合,雖然調查以個人角度顯示大家重視哪樣問題,卻間接將歧視分級,所以大Johnny說得頗對,全部歧視一樣臭。各樣臭糞中,竟然沒有人提出性別歧視?!大家以為四姨太真的成功爭取女性平等???小儀提出「剩女中女」的問題正正就是性別歧視,年紀大女性的求偶壓力往往比男性大;盧覓雪的例子亦是,「大波飛機場」,若大衆用同一個審美標準和態度對待男性,曾志偉有那麽大聲嗎,王祖藍有主角機會嗎?小儀還要在森美旁邊扮蠢呢。性別歧視該不落入「其他」類別吧,當然各人意見不是《黑紙》控制,調查本身卻出了結構性問題,正如問L﹑G﹑B﹑T中撐邊個。

I love G’s part and I appreciate what Black Paper has been doing, so I’m not saying this issue is bad, actually I like it. But I’m rather disappointed with the survey, and I’m not sure if it’s the results or how it’s conducted and presented. It’s nice to draw attention from a personal point of view, but I doubt if it’s necessary to “rank" different types of discrimination — so Johnny’s comment is quite good. And really, out of all discrimination, no SEXISM whatsoever??? I guess it points to people’s (lack of) awareness. IF someone did mention it, it should definitely Not fall into the “Others" category. Kitty Yuen’s example was in fact a result of sexism.

另見:
偉 呀 哥
顧得種族歧視又唔顧得性別歧視

《瘋狂歷史補習社》

tvb crazy history

先唔好講個節目有無抄人先,又先唔好講歷史真確性先,又唔好講係咪真係啟發到對中史嘅興趣先,又唔好講有無男性中心貶低女性先,咩都唔講,淨係講硬件製作,喂,又OK喎;服裝道具﹑動畫視效至演繹方法我都無嘢彈,爭就爭在難得瘋狂重用比喻手法,呢頭避過畫出腸,嗰頭鍾景輝又要做返條腸,解釋咩係誇張咩係借今諷古,真係好辛苦。不過講返製作,老實講一向台慶期出品嘅質素的確高過平時,呢個先係一般可接受水準,其實無綫人才唔少,努力再拉高啲啦唔係人地開台喇(極期待中),再唔努力連人才都留唔住就真係「仆你個街,無綫嚟嘅喂」。

《走過烽火大地》

《走過烽火大地》畫面令人眼前一亮(以無綫水平來講),同類「自製」節目亦算少,本來應該一讚,但紀錄性質似乎麻麻,先略談幾點。

視覺處理:呢個節目嘅出色之處可能就係敗處,圖像處理花咗唔少心思,影像風格鮮明,但係刻意調色相偏黃﹑增強光暗對比,營造室内室外都係「烈日沙場」嘅感覺,只會令寫實減分,亦流失好多攝影機本來應該拍到嘅現實細節。呢種有預設嘅美學投射對正確呈現國家同民族其實唔係幾好,當然即使正統紀錄片都要通過主觀關口再客觀表達,呢方面太多微細爭論,既然《走過烽火大地》走主觀路線出來美術效果亦唔錯,呢點就勉強過關;雖然係咁,作為觀衆應該察覺節目響聲﹑影渲染局勢嘅可能性。

攝人:難得訪問當地居民,人地講嘢時搖來搖去樣都睇唔清,我知,係「拍攝技巧」丫嘛,的確同節目自由行、緊張、個人觀點呼應節奏統一,但係正正經經拍攝受訪者係基本尊重,亦可從佢地講嘢嘅表情﹑語氣睇到好多你唔洗再描述嘅細節;而家剪出來就係人地講嘢你就cut走成段飛俾Tony翻譯,將「聼電視」嘅傳統帶到電視劇以外,真係要聼我寧願配音(最好有麗音),起碼仲睇到影像,明明成大個人響旁邊,你就影住Tony講啲唔知有無改編嘅複述,所謂會面片段就只係作為你會過面嘅證明,真正「記錄外地」作用消失。「聼電視」唔係亂批,佢地見當地嘅香港/中國人就咁影住被訪者,最後一集個中國大叔突然變咗主角。走到中東,你淨係影人講中文?

主持:洪永城Tony黑黑實實,個樣又可愛又醒目,旅遊節目出身總好過求其掉個小生過去,但係外行始終外行,要講戰地slash政治呢門專得來唔太偏嘅題目,難免叫稍有研究嘅各方觀衆說聲膚淺。有人問叫專家主持真係會好啲咩,well,如果research班底唔專,主持專啲無人嫌多,只怕有(娛樂)演講經驗個樣又四正嘅專業人才(正所謂打得又睇得)實在無乜(機會),有學識嘅戲子又難求,唉呀,既然先天不足,咁我地都係將責任推俾團隊喇,對不?

節目定位:呢個節目最關鍵問題,可能就係定位。「走訪戰地」主題好難唔令人覺得呢個係紀錄片,當然直覺以最真實客觀角度批判;咁其實《走過烽火大地》係咩片呢,定只不過係一個吃喝玩樂嘅旅遊節目?但係宣傳同内容又一路標榜「危險」,偷拍到成個真人冒險秀;但係又要溫情採訪返返去紀錄之餘仲要加人性敘述來個《Tony的日記》;咁多嘢一碟,難怪有人夾起舊雞challenge佢無魚味。當然而家興新型節目,未必可以明確歸類,但係節目目的亦應清晰,講故仔亦要make sense掛。如果想主攻平民生活從中了解環境,以人性主導故事式結構,只要認真處理訪問片段深入多少,省去無謂「驚險」,專心做一個主題,呢個節目其實有潛力。

好啦,讚一讚啦,之前提到圖像處理包括啲map呀、graphics呀都做得幾好睇,攝影亦唔錯,同Tony一樣表面得體,係差在内容。講開呢排無綫啲美指又OK喎,《瘋狂歷史補習社》未開始不過睇預告篇好似好得 —— 嗱,雖然係講歷史,但係擺明玩嘢,咁咪叫做定位清晰囉。

原來唔係資訊,唔係新聞,連旅遊都唔係,戰地係「生活消閒」

謝霆鋒

《最佳男主角》中我最喜愛的訪問。

《最佳男主角》

《最佳男主角》廣告出時我第一主觀反應就係黎芷珊有咩本事主持呢個影帝節目,我咁諗唔係對佢有咩特別偏見,事實佢幾nice幾sweet,但人好同能力無關,從佢以往嘅portfolio﹑一貫主持作風,個性同技巧都唔足以帶一個尖銳同有啓發性嘅高質訪問俾觀衆,簡單講,就係内容唔豐富。

果然,結果又係一般粉絲見偶像式訪問(咁當然仰望程度不及萬千刷鞋王崔建邦先生),基本上任何一個《東張西望》主持可以做,而節目本身可以話係《東張西望》豪華版,俾嘉賓舒服啲講私人話題,但深入程度甚至連《今日VIP》都不如,又要包裝成有主見主題專訪。個節目連廣告得嗰半個鐘,每樣嘢講得幾句,幾句中仲要cap返一兩句出來重播做「預告」真係神乎其技,你快啲播埋佢講多兩句好過啦。

咁值唔值得睇?梗要睇啦幾位帝級而家幾可彩你個退步電視台,呢個陣容就算主持欠佳總有得着,只係欠火花欠智慧對談,比較單向教仔。劉青雲同劉德華一個好人一個假,唔敢話小妹妹,吳鎮宇勁啲有嗰句講嗰句(我覺得佢已經忍住唔寸芷珊咁多),今晚睇下黃秋生點對付個節目!