Archive for the ‘ Advert 廣告 ’ Category

高店祝你新年快樂

用咗Facebook之後通常響嗰邊簡短share,好少響呢度放廣告。記得會盡量擺返。

當外國品牌錯嗮時


另見:美劇中的香港

買嘢捐棵樹?捐塊葉都唔知有冇!

 

每次出呢個廣告我都會登返呢篇,以下係2008年1月寫嘅:

買嘢(一般是有包裝或有很多包裝的有需要或無需要的東西)同種樹有咩關係?買嘢通常喺I.T定喺7-11先要用EPS?點解要選擇用一個會產生多 一張(分開會變成兩張的)收據嘅服務而唔用可以重用嘅紙幣/硬幣?如果唔係鼓勵我哋用多啲EPS,如果唔係想我哋連買幾蚊嘢都用EPS,如果唔係鼓勵我哋多啲買嘢/買多啲嘢而只係話俾我哋知我哋好似平時咁買嘢(頻率、地方和量)就可以環保,(如果佢哋真係想環保,)種樹量就唔應該同消費有關──當然一切否定:

「大家用EPS消費每滿10次,金額不限,我們便會捐出HK$1聯同綠色力量為香港市區植樹。…配合你的支持,我們承諾於18個月內最少種植及保育2,000棵樹(捐款額最少港幣5百萬)」

如果真係「買嘢搭棵樹」,每年應該唔止「至少1300棵」(接受EPS付款嘅銷售點有超過二萬五千個,每日幾宗交易?每年幾宗交易?廣告後每年幾宗交易?)。

 

2010年7月:

以上承諾已從iDO網站除下,並響主網站加咗「每天處理超過三十萬宗交易,總值達港幣五億元」幫我答問唔該晒,31個月以來仲係「『已』累積超過五百萬港幣的捐款…種植超過2,000棵樹」,真係好多!!!

 

2011年12月:

「得到你的支持,在過去三年,我們已累積超過1,000萬港幣的捐款,並在香港市區如油尖旺、灣仔及黃大仙等,種植超過3,500棵樹,為香港綠化出一分力,為繁榮的市區增添更多翠綠。」

飲嗰一啖茶浪費一個膠樽,「解人生煩膩」都解得幾過癮喎

都話明星一拍保健產品廣告就全部變白癡/騙子㗎啦,我理得你係張學友丫。

 

 

以下再黎《東西的故事》,樽裝水篇。咪再俾煲水個𡃁仔昆喇。

 

港鐵 心繫生活送你一程

 

 

呢兩個員工廣告效果的確不錯,響故事表達方面屬好睇,甚至要讚第二個嘅對白;問題(同其他更多更好睇嘅廣告一樣)在於佢地唔係故事,而係 廣 告 。廣告要表達嘅信息同大企業嘅意圖同事實相唔相乎,大家大概心中有數,而家唔講呢啲,講呢set廣告隱藏咗咩意識,兩個出事位都響最後。

 

第一個:響講完「就算過時過節冇假放都唔緊要啦」之後對住兒子問幾時返屋企嘅短信講「咁多年來,我仲獻出咗我嘅燦爛人生」,嘩,可以好多讀法。到底佢獻出人生俾公司定係俾家人?獻俾(呢間)公司是否可悲?女性將人生獻俾家人又是否應份?佢嘅人生到底係獻出前定獻出後燦爛?獻出前燦爛,獻出咗仲燦唔燦爛?獻出後燦爛,又可唔可能?獻俾家人後燦爛或有可能,不過佢話冇假放,咁家庭人生仲燦唔燦爛?  Update:多謝網友comment,我係聽錯咗應該係「變」出燦爛人生,唔好意思,不過criticism大體一樣 ── 燦爛人生在公定在私?做呢份工可否燦爛?冇假放在私變唔變得出「生活」都成問題,仲講「燦爛」「人生」? ➨ 我實會講錯嘢,你地comment多啲啱㗎喇,好似TVB錯就要投訴呀!

 

第二個:辛勤通宵工作天都未光齊回家,自動有一雙無名無相主婦手奉上靚湯,持家呢位,或許一同辛勤通宵工作。分開睇或者唔覺,夾埋一齊睇,「男主外女主內」漸現:即使「在外」,媽媽員工仍然要分神理個仔嘅SMS,或者換個講法,仍然想理,想好似雙靚湯手咁奉獻;而老公員工呢,做嘢大晒,返到屋企回望奉上靚湯嗰位,以為佢要講同「變出燦爛人生」一樣肉麻嘅說話,原來係安樂飲住湯話「搵到自己」。即:女人嘅付出係俾人地嘅,男人嘅付出係俾自己嘅。

 

另外仲有一點,響呢度唔係太明顯其實唔洗批評,不過其他廣告太多,你覺得係嘅就自己歸類,唔係就算。廣告嘅主角孩子,通常都係仔,係女嘅話通常都係關於情塔同嫁人=大個要男人照顧,男仔唔同,男仔用來做奶粉廣告啲所謂醒目仔啦、銀行廣告啲要栽培嘅下一代啦,都係好有前途(而呢個前途屬於自己)嘅成龍。睇返地鐵呢兩個廣告,交代完故事臨尾仲要打字話「已婚」、「育有」幾個細路,目的當然係「心繫生活」表現呢啲奴隸同我地呢啲奴隸一樣係有家庭嘅人,人性化冷冰冰嘅logo同企業從而得到共鳴同信任,不過again,呢篇唔講呢啲,我地睇下係仔定女先:女客務主任育有1子1女,不過淨係得個仔出鏡,廣告中個 配 角 女仔呢,要人幫佢戴帽、要人抱、要人湊;男技術員育有2子,「搵到自己」嘅佢家庭完整,有兩個仔相信同飲湯一樣滿足,而以佢嘅年齡,相信嗰兩個仔都同佢一樣成家立室顧住工作所以唔出現或響房睏緊覺等起身飲那碗應份的湯,完。

 

[ 當一個廣告係咁,你可以話諗多咗,但係當一百個廣告裏面九十五個、一千個裏面九百八十個都係咁,就係現象。現象未必明顯,唔明顯嘅現象先至可怕,因為我地會不知不覺跟隨某種思考模式,即使有害。]

便便便便便便便便便便便便便便

唔知幾時啲奶粉廣告開始有便便trend,隨時叫觀眾便便撈飯。

 

 

@samuel3323:BB 有便便周圍同人講,重要 Share 俾人知,我唔撚想知,Block 柒你
@colanhong:叫設計呢個廣告個個柒頭自已食撚左d便便佢啦

 

 

雖然我幾鍾意吳君如,不過呢個廣告真係唔知想點,通常明星一拍保健產品就全部變白癡/騙子。

@cychick:吳君如問: 「你女女轉飲呢隻奶粉之後, D便便靚唔靚靚唔靚呀?」 答: 「靚!」 吳君如問:「有無你女女咁靚呀?」答:「有!」….. 嘩! 即係你女女好似舊屎咁靚?! -o-
@miki0425:唔好人講就信 咁點解我又要信你 X(

 

 

雖然美國雅培所謂嘅「醒目」好有問題,呢度又寸得OK啦。

 

百分百copywriting


「百分百不含香料」或許對某啲人重要,不過代表啲咩?你可以話你支嘢百分百不含屎、百分百不含外星人、百分百不含林志玲,咁含咗啲咩你又唔講,我鬼知你啲「突破性CL-302」裏面係乜,美白產品(唔係香體產品)不含香料係咪好正常先,或者市面上真係有好多含香料,不過你無人地嘅問題都唔代表呢個係你「令人安心」嘅原因播。

The Story of Stuff 好緊要,大家一定要睇,以下係化妝品篇:


珍寶 in motion