《飛女正傳》FLY WITH ME

《飛女正傳》果然冇令我失望甚至俾到我無限驚喜。本來應該響未完之前推一推,但係實在精彩到唔知點講,正如影評都唔能夠助你了解王家衛電影嘅神髓 ── 如果你本身冇睇,或本身感受唔到;所以一般呢啲嘢都係俾已經明白嘅人睇,雖然已經明白嘅人又未必需要呢啲嘢,但人總要寫啲筆記(「人總要…」響呢套劇都出得多lu,仲有「大早」),咁我就寫啦:

對白
有周旭明就唔可以唔講編劇/對白,睇劇中一個totally random嘅巴士司機講西緒弗斯故事就知道呢套嘢唔嘢少;佢唔係犀利在能夠將人平常講嘅做嘅精確咁寫返出來,而事實上無可能有咁多人講嘢講到好似周旭明(筆下角色講嘢講得)咁聰明,同一般tvb誇張失實嘅編劇嘅分別,就係佢能夠以最戲劇化嘅對白內容,表現最真實嘅心理,描繪人性得徹底。尤其係《飛女正傳》呢一類片,邊個要求「寫實」?呢次周旭明最大突破,就係搞笑同癲到不得了同時做到佢一貫做開嘅講計謀講道理,又能俾一個大眾比較接受到嘅level去輕鬆一下 ── 有指一般師奶們仍然接受唔到囉,但以我媽同佢朋友來睇,佢地都幾buy ── 減少咗《金枝慾孽》、《火舞黃沙》、《珠光寶氣》等等昂貴高格調嘅味道又keep住深度,十分本地題材(e.g. 以手機演變拍住香港政治變化、巴士電車終於出現、活塞男、疑似Yvonne/Frankie青少年受訪片段)俾個位接近大眾,其他題材如老豆(餘子明演)成日講19xx年發生咩事咩事同舅父(李家鼎演)成日講人生哲理簡直精彩到爆,毫無兜圈擺明車馬單刀直入用任何角色把口同你講道理,呢套劇個個角色都係哲學家個個都可以唇槍舌劍,理得你現實係唔係咁總之每句對白最終都講緊現實;關於物種進化嘅旁白voice-over與手塚治虫故事發人深省嘅文字總結尤其相似,所有所有大智慧響瘋癲搞笑之中殺你一個措手不及,問你死未。

情節佈局對白精細幽默巧妙嘅處理太多唔逐一講,當中非常可愛嘅係佢用咗好多tvb用開嘅低能/awkward手法來以毒攻毒再反咬一口,例如 容伯駒同Frankie兩人唔入私家車面向鏡頭慢慢行山對談後面跟車 -> 之後Frankie好凍問啲有錢人係唔係鍾意咁樣傾計;Frankie翻檯弄舞手勢多多激動誇張同Yvonne講佢唔領情有幾失望 -> Yvonne同佢講成間餐廳得佢地兩個洗唔洗咁大聲浮誇;神棍同Wilson開心佢地之前點樣造假寓言逐樣講連過程解釋 -> Cathy話佢地洗唔洗講得咁清楚慌死人唔知自己點犯案如果有人裝咗偷聽器就前工盡費;Selina入到屋見有人跡象自己對住鏡頭猛估係邊個 -> Edmond後面出現話要改佢自言自語嘅壞習慣;等等等等。〔大概意思,唔係直quote〕

未become a fan嘅,以後凡有周旭明出品必要留意,唔好因為tvb出品而唔睇喇會好走寶。

人物
《飛女正傳》非常comic,大小人物個個性情分明而且全部戲份足說話多人人有大頭永不落空,特別可能因為今次女性主題所以女角發揮機會比其他劇多(諗落《金》、《火》、《珠》等都係)但係又多得唔過份,男角同時起重要作用,各人戲份complementary,無爭無搶個個恰如其分同時要妙語連珠一句緊接一句,一齊考考演技練練記性,就算我一般唔多鍾意嘅餘子明同韋家雄都妥當唔哽眼,連小小角色孻表叔(張漢斌演)都有趣可觀,幾位office ladies同護士亦唔弱,羅莽演嘅羅振強夠有代表性,李家鼎演嘅舅父當然叫人欣賞,又點少得靚鬚有型黃德斌演嘅楊浩然同Golden Billy陳豪演嘅簡明軒,不過好還好,呢次最catch我attention嘅係以下幾位:


周家怡/Selina ─ 見佢今次戲份比以前多咁多戥佢開心,樣貌不太出眾嘅女演員有自己獨特嘅位置係唔容易嘅事,演Selina(同之前其他)睇得出佢好用心出來效果亦好好


朱慧敏/Cathy ─ 雖然又係佢演開嘅美艷角色除咗身材冇咩唔同,但同樣戲份比以前多好多,角色誇張得來有微妙嘅情感變化,由驕傲巴閉到慢慢滲出善良一面都處理得好好


簡慕華/Macy ─ 多年平平穩穩,終於有大(啲嘅)角色喇!一直俾佢嘅氣質同faye一般樣貌吸引,唔知係唔係個樣淡定大方,好似成日被安排演人地唔鍾意佢佢又唔介意好想得通嘅角色,呢次/《畢打自己人》/《烈火雄心3》(最深刻)都係咁…〔響Facebook支持下佢啦〕


曹永廉/Frankie ─ 一向對曹永廉冇咩興趣甚至唔係幾鍾意,不過演開傻仔嘅演奸角往往有驚喜(re:郭晉安),佢呢個potential由《ID精英》開始睇到,角色分配真係好重要

最後講角色講演員當然唔少得蔡少芬/Yvonne/Janet Bin啦,唔洗講咁多,總之係好、好好!

整體
以上種種安排協調,成熟統一嘅畫面處理,成套劇鮮明嘅整體效果,相信多得戚其義,不過我太為周旭明嘅文字著迷加上對監製嘅角色太唔熟所以唔識多講。簡單舉幾個例當然又係近年最愛《金枝慾孽》同《火舞黃沙》,以電視劇來講畫面構圖真係高水準美感表現,加上古裝大家大族更見grand又elegant,《珠光寶氣》屬同一類;《天地豪情》、《創世紀》等時期我仲細印象較淺,只記得係好嘢,《先生貴性》都夠新鮮喇掛,係之後《妙手仁心Ⅲ》開始認得周旭明作風(我連睇《刑事情報科》都認得佢啲字咬字,不過因為嗰套嘅規模仲以為有人扮佢…原來有啲功力真係扮唔來)多咗留意周,再留意到呢對黃金拍檔。

有人話Janet Bin飛天好假,呢套劇cult成咁再假啲又如何,香港呢個地方有啲咩科技咩技術大家清楚,響呢個咁嘅地方都難得有兩位精英(連同台前幕後眾多人馬)肯為廣大觀眾拍非主流有思想有質素有情操嘅電視劇,未睇已經批評嘅你仲要求啲乜?

另外
呢度同好壞冇咩關係亦無啟示,只係留意到覺得幾得意:

─ 對Yvonne痴心一片仆心仆命不問回報嘅Frankie呢個角色似曾相識,記唔記得《珠光寶氣》嘅禾仔(王喜演)?而家重播《天地豪情》先記起雄仔(陳錦鴻演)又係咁,三個嘅對象都係蔡少芬!!!
─ 周家怡死纏黃德斌已經唔係第一次,大早《珠光寶氣》出現過~

Update: 《En attendant Godot》(Waiting for Godot)小參考

廣告
    • 匿名
    • 五月 28th, 2010

    你真係好鍾意個戲喎!

    • Xeno
    • 六月 8th, 2010

    Hello,

    I, myself, also in love of this program.

    I personally love one of your point “佢用咗好多tvb用開嘅低能/awkward手法來以毒攻毒再反咬一口". I think that that is why I love this program. I read that many people did not like this program b/c of it’s 低能. But I don’t think that any of them really watched the program or even tried to understand what’s it about.

    —容伯駒同Frankie兩人唔入私家車面向鏡頭慢慢行山對談後面跟車 -> 之後Frankie好凍問啲有錢人係唔係鍾意咁樣傾計–

    This is one of the best scene!!!!!

    I really like your view and I have to agree most of them!

    Great Job!
    XOXO

  1. 四月 4th, 2011
  2. 七月 15th, 2011
  3. 十一月 20th, 2011
  4. 十一月 24th, 2011

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s